Prapanna Janani Vrti Jvalati

#

Krsna Kirtana Songs est. 2001                                                                                                                                                www.kksongs.org

Home ⇒ Song Lyrics ⇒ P

Song Name: Prapanna Janani Vrti Jvalati

Official Name: Parama Guru Prabhu Varastakam

Author: Visvanatha Cakravarti Thakura

Book Name: Stavamrta Lahari

Language: Sanskrit

LYRICS:

(१)

प्रपन्नजननीवृति ज्वलति संसृतिर्ज्वालया

यदीयनयनोदितातुलकृपातिवृष्टिर्द्रुतम्

विधूय दवथुं करोत्यमलभक्तिवाप्यौचितीं

स कृष्णचरणः प्रभुः प्रदिशतु स्वपादामृतम्

(२)

यदास्यकमलोदिता व्रजभुवो महिम्नां ततिः

श्रुता बत विसर्जयेत्पतिकलत्रपुत्रालयान्

कलिन्दतनयातटी वनकुटीरवासं नयेत्

स कृष्णचरणः प्रभुः प्रदिशतु स्वपादामृतम्

(३)

व्रजाम्बुजदृशां कथं भवति भावभूमा कथम्

भवेदनुगतिः कथं किमिह साधनं कोऽधिकृत्

इति स्फुटमवैति को यदुपदेशभाग्यं विना

स कृष्णचरणः प्रभुः प्रदिशतु स्वपादामृतम्

(४)

तपस्वियतिकर्मिणां सदसि तार्किकानां तथा

प्रतिस्वमतवैदुषीप्रकटनोढगर्वश्रियाम्

विराजति रविर्यथा तमसि यः स्वभक्त्योजसा

स कृष्णचरणः प्रभुः प्रदिशतु स्वपादामृतम्

(५)

किमद्य परिधास्यते किमथ भोज्यते राधया

समं मदनमोहनो मदनकोटिनिमज्जितः

इतीष्टवरिवस्यया नयति योऽष्टयामान्सदा

स कृष्णचरणः प्रभुः प्रदिशतु स्वपादामृतम्

(६)

मृदङ्गकरतालिकामधुरकीर्तने नर्तयन्

जनान्सुकृतिनो नटन्स्वयमपि प्रमोदाम्बुधौ

निमज्जति दृगम्बुभिःपुलकसङ्कुलःस्नाति यः

स कृष्णचरणः प्रभुः प्रदिशतु स्वपादामृतम्

(७)

समं भगवतो जनैः प्रवरभक्तिशास्त्रोदितं

रसं सुरसयन्मुहुः परिजनांश् च यः स्वादयन्

स्वशिष्यशतवेष्टितो जयति चक्रवर्त्याख्यया

स कृष्णचरणः प्रभुः प्रदिशतु स्वपादामृतम्

(८)

स्थितिः सुरसरित्तटे मदनमोहनो जीवनं

स्पृहा रसिकसङ्गमे चतुरिमा जनोद्धारणे

घृणा विषयिषु क्षमा झटिति यस्य चानुव्रजे

स कृष्णचरणः प्रभुः प्रदिशतु स्वपादामृतम्

(९)

इदं प्रभुवराष्टकं पठति यस्तदीयो जनस्

तदङ्घ्रिकमलेष्टधीः स खलु रङ्गवत्प्रेमभाक्

विलासभृतमञ्जुल्याल्यतिकृपैकपात्रीभवन्

निकुञ्जनिलयाधिपावचिरमेव तौ सेवते

UPDATED: January 16, 2017