Adurvidha Vidagdhataspada

#

Krsna Kirtana Songs est. 2001                                                                                                                                                 www.kksongs.org

Home ⇒ Song Lyrics ⇒ A

Song Name: Adurvidha Vidagdhataspada

Official Name: Sri Vraja Navina Yuva Dvandvastastakam

Author: Rupa Goswami

Book Name: Stavamala

Language: Sanskrit

LYRICS:

(१)

अदुर्विधविदग्धतास्पदविमुग्धवेशश्रियोर्

अमन्दशिखिकन्धराकनकनिन्दिवासस्त्विषोः

स्फुरत्पुरटकेतकीकुसुमविभ्रमाभ्रप्रभा

निभाङ्गमहसोर्भजे व्रजनवीनयूनोर्युगम्

(२)

समृद्धविधुमाधुरीविधुरताविधानोद्धुरैर्

नवाम्बुरुहरम्यतामदविडम्बनारम्भिभिः

विलिम्पद् इव वर्णकावलिसहोदरैर्दिक्तटीर्

मुखद्युतिभरैर्भजे व्रजनवीनयूनोर्युगम्

(३)

विलासकलहोद्धतिस्खलदमन्दसिन्दूरभाग्

अखर्वमदनाङ्कुशप्रकरविभ्रमैर् अङ्कितम्

मदोद्धुरमिवेभयोर्मिथुनमुल्लसद्वल्लरी

गृहोत्सवरतं भजे व्रजनवीनयूनोर्युगम्

(४)

घनप्रणयनिर्झरप्रसरलब्धपूर्तेर्मनो

ह्रदस्य परिवाहितामनुसरद्भिरस्रैः प्लुतम्

स्फुरत्तनुरुहाङ्कुरैर्नवकदम्बजृम्भश्रियं

व्रजत्तदनिशं भजे व्रजनवीनयूनोर्युगम्

(५)

अनङ्गरणविभ्रमे किमपि बिभ्रदाचार्यकं

मिथश्चलद्दृगञ्चलद्युतिशलाकया कीलितम्

जगत्यतुलधर्मभिर् मधुरनर्मभिस्तन्वतोर्

मिथो विजयितां भजे व्रजनवीनयूनोर्युगम्

(६)

अदृष्टचरचातुरीचणचरित्रचित्रायितैः

सह प्रणयिभिर्जनैर्विहरमानयोर्कानने

परस्परमनोमृगं श्रवणचारुणा चर्चरी

चयेन रजयद्भजे व्रजनवीनयूनोर्युगम्

(७)

मरन्दभरमन्दिरप्रतिनवारविन्दावली

सुगन्धिनि विहारयोर्जलविहारविस्फूर्जितैः

तपे सरसि वल्लभे सलिलवाद्यविद्याविधौ

विदग्धभुजयोर्भजे व्रजनवीनयूनोर्युगम्

(८)

मृषाविजयकाशिभिः कलितचातुरीराशिभिः

ग्लहस्य हरणं हठात्प्रकटयद्भिरुच्चैर्गिरा

तदक्षकलिदक्षयोः कलितपक्षयोः साक्षिभिः

कुलैः स्वसुहृदां भजे व्रजनवीनयूनोर्युगम्

(९)

इदं वलिततुष्टयः परिपठन्ति पद्याष्टकं

द्वयोर्गुणविकासि ये व्रजनवीनयूनोर्जनाः

मुहुर्नवनवोदयां प्रणयमाधुरीमेतयोर्

अवाप्य निवसन्ति ते पदसरोजयुग्मान्तिके

UPDATED: October 11, 2015